Sevilla Kurztrip 29/09-03/10/07

SA - ISEOSEA
Mitn Auto von Meran bis noch Sarnico am Iseosea gemiatlich und foscht ohne Stau obr stärkeren Verkear und zu insern Geheimplatzl (des i logisch af den Weg nit verrot, suscht wars jo nimmer geheim!). Mir sein schun super empfongen gwordn (guarda arriva Christian..) und hom di 45Eur glei gezohlt, 5e hot sie ins nochglossn weil mer jo vorn Frühstück starten. Es wor durchs Wetter a wia kiahl obr recht schian am Sea. Obends afn Zimmer mit gekaafte Sochn ausn Supermarkt gspeist und nor friah liegn gongn.



SO - SEVILLA unkemmen
Um 4e ausser, weil dr Fliagr jo schun um 6:20 geat und i des mitn onlineinchecken leider versaut hon. Afn Weg zum Flughofn homer an beasn Autounfoll odr bessr di Folgen von sem gsegn. Isch jo di beschte Zeit mit di drogati und impasticati spaziern zu fohrn..
Dr Flug wor recht nett, so fria seinmer no nia glfogn. In Sevilla hots glei moll a por Grad mear ghob, es hot di nexten Tag olm Werte zwischen 20 und 32 Grad ghob, recht fein. Mitn Bus (1x umsteign geat obr a ohne) zum Zentrum und glei moll in a coole Bar frühstücken. Die Bar wor überfoll von olte Pensionisten aus dr Umgebung und während i mit Händ und Fiass um a Bestellung kämpfen gmiasst hon (dei oltn Krocher sein echte Matadors wenns ums Frühstück geat!), hot di Ebbe es nit leicht ghob insern Tisch zu verteidigen wo sich nor trotzdem 2 olte Tanten hingsetzt hobn und sie vollgequatscht hobn.
Im Hostel, a ziemlich ogfuckte Bruchbude, di Hälfte reissn sie grott o währet mer drin sein, hon i glei moll wia in dr Internetseite beschriebn es Gelg für di Busunfohrt zruckverlong. Hot gekloppet ohne Probleme obwohl di Dame hinterm Tresn von so wos nia eppes gheart hot.
Noch an Rasterle homer ins di GIRALDA ungschaug wos jo a Pflichprog isch und die Stierkompfarena, die Maestranza, wo olleweil a Tirada wor. Uaner hot mer glott gwellt 2 billjetes undrahnen für 30EUR obr Ebbe will so a Obschlochtn nit unterstützten, jojo..



MO - SEVILLA
Noch an lautn, sehr lautn Nocht , irgend a Heini hot erst Gitarre gspielt und nor die Waschmaschine ingscholten, hommer mit viele ondere Jugendherbergler desayuno gmocht, wos aus an hoassn Schocki und por Brotn bestondn hot.
Übrigens homer pro nocht und Kopf 34,50EUR für dei Bruchbude bezohlt! Obr isch ebn Sevilla..
Es Barrio Santa Cruz und a guater Gazpacho (kolte Tomatensup) worn nit schlecht. A kluans misslungenes Rasterle nocher. Misslungen weil di albanilos locos(Maurer)greassere Steaner bis in insere Bod gschleidert und di Hiltis gschwungn hobn.
Die Museums-Tour durch di Maestranza wor echt fett. In Obend homer nor mit Manzanilla (a guater Äpfelwein) a por Cervezas und insern ersten Montadito (Brot mit Lachs) ausklingen glossn.



DI - SEVILLA
Desayuno, 2te Hondshoptour durch holb Sevilla mit schlechtm Erfolg, Tapas gfuttert und a Rasterle mit TV und Tv remote controll af pump. Orbeiter hom logisch wieder di Nummern gebn, also nix mit rosten..
Drfir hot es pan con azeite (Ölbrout)und a sumo de naranja (uanfoch Orangensoft.. )um so besser gschmeckt drnoch. In dr oficina de turismo hom sie ins a nit weiterhelfn gekennt wegn 2terhondshops, überhaupt hot do niamend english gekennt, saulodn..
Di Piazza de Espana wor dr Hommer und gigantisch groass. Schaug obr elter aus als sie isch, erst um 1930 gebaut, maricons! Im Parque Marialuise homer nor wiedr a Rasterle gmocht unter di urolten Bam und di exotischn Fegl.
Afn Obend hots nomoll 1 1/2h Extremshopping gebn bei strömendn Regn. Hon ausser an Unhänger nix gekaaft also hon i mer no an Montadito gegönnt. Afgrund von Unverständnis beim Tofellesn hon i an Ort fettige Straubn drwuschn..najo! Nocher hot mer no a versiffter Zeitgenosse in an eigenortign Galerie Marihuana ungbotn des i logisch oglent hon. Bin liab huam unter di Dusche weil i fetznoss wor.
Dei Nocht hon i di Ornstopsl so weit innigschobn dass i sie lei mit Hilfe von Ebbe und an Hoorspong wiedr aussergekreag hon!



MI - GARDASEA
05:45 get up und quer durch di City und mitn Airbus zum Aeropuerto. 09:20 Ablug und um 13:00 schun in Desenzano am Gardasea Spaghetti allo scoglio mampfen. No an Eis in Riva, 2x Stau wegn beaser Motounfälle und endlich wieder drhuam in dr trautn Villa!

Bärenbadalm

Bei super Wetter seinmer heint mitn Auto bis noch Pawigl (ca. 1400m, viele Kurven, orme Ebbe..) und hom es Auto beim groassn Parkplotz glossn der schun ziemlich zuageparkt wor.

Nor seinmer in Weg noch aui, olm links holtn bis zur Bärenbodolm (1678m) von wo mer nor bei Soft und Kuchen in herrlichen Fernblick (Gugger hon i drbei kopp) af di Dolomitn genossn hobn.

Donn ischs weitergongen über an ondern Weg Richtung Jocher zur Bergstation von Vigiljocherbahnl und nor weiter zruck zum Pawigler Parkplotz.

So hommer an schian Rundweg von 250HU gmocht.

Gardasea

Weil mer ins gedenkt hobn, dass wegnen Schualbeginn togs darauf nit viele Leit mer am Gardasea sein und eh super Wetter isch, hommers riskiert und sein oigfohrn. Dem wor obr leider nit so! Turris und Sunntigfohrer worn no genua af dr Autobohn, am Sea und in die Stadlen.

Um holb 10e gstartet seinmer trotz heftigem Verkehr schun mit an Pims von dr Autoroschtstette in dr Hond am Seaufer in der Nähe von Torre del Benaco gsessn und hom di Sun genossen. Es Wosser wor relativ worm trotz der heftign und heufign Regengisse in leschter Zeit. Nochdem mer genua Sun getankt und gschwottelt sein, seinmer weiter bis Malcesine (dr Klassiker!) und sein durch di Gasselen strawanzt mit an Eis in dr Hond.



Afn Rückweg seinmer in an gewoltigen Stau kemmen der schun bei dr Bergunfohrt in Torbole ungfongen hot (so eppes hon i nia gsegn) und erscht bei dr Autobohneinfohrt von Rovereto aukeart hot. Worscheinlich wegn 2 Motos dei in an Kurv aneinonderkemmen sein und iatz di Toaler afn Asfalt verstreit hobn. Donn ischs recht schnell mitn Fiat Ferrari Punto huamgongen.

Mutspitz (2294m)

Heint gea i mitn Andreas von Schenna in die Therme schwimmen. Bei den schian Wetter werds sell sicher nit schlecht. Er hot sich für holb 10e ungekündigt. Also hon bin i no schnell in di Schwimmhosen gschlüpft mit longe Jeans driber und hon in rucksock fürs Schwimmen gepockt.

Aufgetaucht isch er obr schun um 9e, zum Glick wor is obr schun. Erscht als i im Auto gsessn bin hot er strohlend verkündet, heint gianmer woll af di Mut odr? Hä? Honnen zum Glück no übereden gekennt nomoll in di Wohnung zruck zu gian und di Schwimmsochn mit Bergsochn (Gucker, Proviant, Bergschua) auszutauschn.



Nor ischs mit sein Auto zur Tolstation der Mutsoalbohn gongen, dei mer nor mit viele ondere Turris gnummen hobn (3,50 EurEinheimischenpreis Singlefohrt). Man isch wirklich in 5 min von 573m af 1350m obn. Sem seinmer nor af Weg 22 zum Mutkopf und nor weil mer no fit worn nit zur Bockerhit sondern direkt af di Mutspitz (2294m).



Dr Weg isch es leschte Stickl recht steil und bis zur Spitze seins 950 HU. Mir hom dertersch di meisten Turris okeng und hom nor nebnen Gipfelkreiz di supertolle Aussicht (man sig von Pseier bis Terlan und bis ins Martelltol!!) genossn und an Äpfel gfuattert. Dr Andi hot sich in Hunger ausporn gwellt und erst beim Helly essn gwellt weil der suscht beleidigt war.



Noch an kluan Roscht isch weitergongen über an Grat oi und ai ins Spronsertol über di Taufenschorte, wo man super zur Leiterolm und zum Hoachgonghaus oischaugn konn, bis zur Oberkaserolm mit 2 kluane kolte ober schiane Sean. Sem homer nor wieder Roscht gmocht und hom a Pockernes mit Knödel verschlungen (dertersch weils schun holbe 2 wor! und zum Glick weil mer beim Helly nix gekreag hatn um 5e!). Nochher homer ins a Deck ausglichn und a holbstindiges Raschterle gmocht af dir Wies. Leider hommer nochher feschtgstellt, dass der Kuatoschn den dr Andi fir ausgetrucknet gholtn und di Deck draufgleg hot es nit wor.. schnell Deck so zsomgleg, dass es nit auffollt, zruckgebn und schnell es Weite gsuacht!



Nor isch dr Weg sticklig owärts gongen bis zur Bockerolm wo dr Andi sein 5tes!! groasses Glos Milch oiglaart hot und weiter bis zum Helly. Leider wor drsell, nit wia er gsog hot er muass orbeitn und isch sicher drhuam, leider nit do und so hommer ins no af miade Fiass bis zum Tiroler Kraiz gschlaift wo ins a takter Busfohrer gratis zen Parkplotz mitgnummn hot.

Wor gons schian a Tour. Start von dr Bergstation um 09:30, 1/2h Pause afn Gipfel, 1h beim Oberkaser, zruck um 18:00 bei Parkplotz, also 7h eine Gehzeit und 950HU! Mein Summerrekord obr onscheinend ganget no mer denk i. Wor echt a super Tour!

Kluaner Kornigl (2308)

Aufn Grad hintn auer. Do wormer nit..


Nomoll dr Grat. Wormer a nit..


A nit..


Des sigmen von obn aus. Do wormer..


Kluaner Kornigl


Ausicht aufs Nonstol


Kluaner Kornigl mit Oberolm
Mir sein von vorne auer..


Gipfelkreiz vom kluanen Kornigl


Cloznerolm


Heint seinmer afn Kluanen Kornigl gongen. In Tip honmer von dr BAZ ausser von an Christl Fink, dei suscht a Wonderbiacher schreib. Laut ihrer Beschreibung seinmer ins Ultentol, noch Proveis und donn bis zum Parkplotz nochn DRITTEN Tunnel rechts.

Komischerweise wor sem obr kuane Forschtstros von der mer weckwondern gsollt hatten. Also seinmer weitergfohrn bis zum nächsten Tunnel noch dem rechts a Parkplotz wor mit an Forschtweg zu an Gompenolm. Von ondere Schilder kuane Spur. Also seinmer losmarschiert, hom ins wia bei dr Wegbeschreibung in dr BAZ verholten, erste links und weiter.. Noch 1h seinmer im bewucheretn Wold gstonden und es isch nirgends mer weitergongen. Dr Bär wor a nirgends ummer den man frogn gekennt hat..

Also nomoll zruck bis zum Auto und an Tunnel weiter. Noch den Tunnel, in FÜNFTEN liebe Christl!!, honmer ins nor glott zurechtgfundn mit dr Beschreibung und sein bold (30min) af an
schian broatn Wies mit dr Oberolm drauf kemmen und hom di beaden Kornigl gsegn. Links in groass und rechts in kluanen wo mer ai gwellt hobn.

Noch an wurschtign Pause ischs weitergongen mit vollem Bauch di stuanign Serpentinen aui. Weil mer es Kreiz schun vor ins gsegn hobn und in stuanign Weg load worn, seinmer a "Obkirzung" grod in steiln Hong auigekrahlt bis zum Kreiz. Di Aussicht wor super.
Man hot ins Nonstol gsegn und a di drei Olmen (Oberolm, Clozolm, Rawauerolm/Revòolm).

Dr Rückweg zur Oberolm und nor zur Clozolm wor knoching. Bei dr Clozolm (15min von Oberolm) hommer no a kluane Roscht eingleg und nor ischs zum Auto zruck gongen.Mir hom no a Ehepaarl zum dritten Tunnel gfihrt wo sie es Auto geparkt hobn. Ihnen isch gleich gongen, Christl! Sie hobn ins obr nor an guatn Tip gebn fürs nextemoll. Über dr Gompnolm (war di erste Kreizung rechts gwesn.. 1 1/4h) über an schian Wiesnweg zum Kornigl. Onscheinend di bessere Wegvariante und nit so stuanig!

HU ca. 580m vom Parkplotz aus.

Nextemoll seinmer schlauer.. Obr schian wors trotzdem.
1,2,Christl, 4,5!

Schwarzhorn

Heint sein mer mitn Auto ins Eggntol bis zum Jochgrimm gfohrn. Von sem hot nor insre Tour ungfungen afs Schworzhorn (2439m), Zwillingsberg von Weisshorn (2316m). Es sein vielleicht 400HU vom Goschthaus Schworzhorn. Es geat erst durch an Weg durchn Wold, mon konn a di Schipischte wähln obr sell isch longweilig, nor geats mit drselbn spaatr zsom. Es leschte Stuck vom Wold ausser isch a wia strenger und man sollte relativ trittsicher sein weils dert rechts owärts geat afnimmerwiedersegn.

Obn hommer nor es Gipfelkreiz gegreasst (Ebbe's 2te!!) und di herrliche Aussicht genossen, sie geat vom Fassatol übers Fiemmetol bis Tramin und Brixen, also 360° konn mon foscht sogn.

Noch an 1/2h Rost und an guatn Pims seinmer wieder owärts, di fliagenden Unmoasn sein ziemlich läschtig gwordn. Hom ins beade vollgepisst, des hot gepissn!!

Im Goschthaus homer no a Sportwosser getrunken und Formel1 gschaug und sein nor weiter bis noch Cavalese a guats Eis essn. Nor hot mi di Ebbe übern Poss gfihrt noch Auer und i bin nor weiter bis huam.

Riffianer Waalweg

Von Riffian aus seinmer bis zum Woolweg auigwondert. Wor ziemlich steil für 10min obr oben geats leimer grod a guate holbe Stunde. Dr Wollweg isch wirklich schian kiahl, schottig und mit an guatn Aussicht. Leider isch noch an 1/2h olls vorbei.

Sem geats über an Asfaltstross zruck noch Riffian. Wenn man will kannt men schun moll di ondere Richtung gian bis noch Dorf Tirol und zen Helly inni.

Afn insern Weg hot af uanmoll a ältere aus der Puschte dorherennender deitscher Jogger bei ins gholtn und ins vollglabert wos er so dei Woche no olls tian werd, wia er ins schun ewig kannet, nor isch er weitergrennt.. Luschtiges Pirschl!

Hoachgonghitt - 300HU

Mir sein heint mitn Scooter bis noch Vellau (Sessellift Algund-Vellau war 5€/Kopf gwesn!) und nor homer in Korblift, olm 2 Leit passn inni, gnummen (Mittogspause 12-13 Uhr, 6,25€/Kopf, mitn Scooter kimp man und terf man nit gonz aui bis Leiterolm) und sein so bis zur Leiterolm. Dei isch 5 Minuten von dr Bergstation entfernt und man hot an tollen Ausblick gegen Dorf Tirol. Schun vom Korblift ausser übersig man gonz Etschtol bis Eppan.

Von dr Leiterolm 1550m ischs nor weitergongen bis zur Hoachgonghitt 1839m auf Weg 24 ca. 1h 20min. Es geat am Unfong ziemlich steil aui (ca. 15min) über an stuanigunglegn Weg, Stöcke sein so guat wia überflüssig. Spaater geats nor di gonze Zeit aui und oi, Tol inni und Tol aussi, über Bäche und Knotn. Aussichthot man nit di beschte, ziemlich selten lei a Blick ins Vinschgautol, meistens sig man Bam.

Bei dr Hitt donn kimp man af a broate Wies ausi wo mer in mitgnummnen Pims gessn hobn. Bei dr Hitt no an Kuchn nochgworfn und eppes getrunken, an Hos ungschaug in an Käfig der wia dr Oasterhos ausgschaug hot, bissl von an Aussichtsturm ins Tol geguckt und sell wors. Owärts ischs recht schnell gongen bis zum Korblift mit den mer nor zruck ins Tol sein.

Felixer Weiher und Gantkofel?

Mitn Scooter übern Gompen bis zur Schronk und nor mit die Steckn zu Fuass weiter zum Sea. In 35min wor mer am vom Walschen und Piefke (Ferragosto!!!) besudelten Sea. Den hom die erst in Friajohr ausgebaggert und muass sogn echt guate Orbeit gleistet, sogor 2 Stege zum einispringen hom sie ungleg.

Noch a bissl Plantschen (Ebbe nit wegn ihrer Warzenbehondlung), bei dem wia a Fisch beim toatn Mannlmochn ungeknabbert hot, hommer ins mit Kaminwurzen und Butterbrout vollgstopft.

Nor hommer ins gedenkt giammer a wia weiter zum Gantkofel, sein jo lei 290 HU, Zeit und Kroft hommer jo.

Obr als es noch 1 h af uanmoll lei mer owärts gongen isch und mir ins schun gegraust hobn beim Gedonken do wiedr auerzukrahlen (folscher Weg odr 290HU owärts?), hommer ins in a Wies innighaut und a wia grostet.

Nochher sein mer zur Waidmannolm beim Weiher zruck und, wia konns onderst sein, hom an Eisele gessen.

Zruck zum Scooterino und übern Gompen wiedr huam.

Longsea in Ulten

Heint sein mer ins Ultentol mitn Auto bis zum Weisbrunnersea gonz drinnen af 1896 Meter wo a di Knödelolm isch. Zu fuass seinmer weiter bis zum Fischersea (30min) wo i a Pause gebraucht hon, weils ziemlich steil auwärts gongen isch. Ebbe isch komischerweise auigrennt wia a Gams, mir hot es Saufgelage inTtog drfor onscheinend mer zu schoffen gmocht.. Beim Fischersea wor mer a nit alluan, viele Turis wia überoll in die Augusttog. So seinmer bold weiter aui zum Longsea wos sich a bissl gezogn hot. Obr es hot sich wirklich ausgezohlt, toll do obn.


Weissbrunnersea

Zruck seinmer in gleichn Weg, lei mit a bissl zu streitn weil i onscheinend orgrennt bin und sie nit nochkemmen isch, bis zum Auto. Aussiwärts hon i ihr drfir an leckern Eistegl offeriert und die Welt wor wieder in Ordnung.

Kratzbergersea

Von Folzeben (Parkplotz 2EUR) seinmer mit dr Bohn (6,5EUR) bis zum Piffinger Kepfl und zu Fuass weiter bis zu die Kratzbergersean (1,5h reasch gian). Von do sig man guat in Sarnertol oi. Dr Weg isch an a por Stellen a wia ausgsetzt, man sollet holt schun a wia trittsicher sein damit man nit oipurzelt zu die Sarner!



Dr Sea isch wunderschian und obwohls a bissl gregnt hot, hot man in weißen Sond vom Sea gsegn. Noch an kurzen Stärkung seinmer zum Kirchsteigergosthaus wo ins a wirsche Wirtin mit dr Kschig im Maul und a singender Piefkesagaverirrter empfongen hot. Also noch an Tee (wor recht frisch..) glei weiter tolausiwärts zur Roatwondhit, Zuegghit und endlich zum Parkplotz und nor back huam.

Lienz-Simpsonsfilm-Pizzaessen

Wegn schiach Wetter seinmer heint noch Lienz gfohrn bissl shoppen und vor olm in Simpsonsfilm unschaugn!

In Lienz sein wia überoll af der Welt zu der Zeit onscheinend lei Walsche unterwegs gwesn. Obr der Film wor echt wicked! Hom ins di gonze Zeit drkugelt!

Nochdem mer no a bissl afn Ruckweg in Sillian shoppen worn, seinmer huam.

Spaater nor zur Pizzeria Hons mit die Schwiegereltern dei ins zum Essen inglodn hobn. Am Ende hots no a Schnapsl gebn und olle womer guat au.

Antholzer Sea

Ebbe hot in dr Friah endlich es Volksbankbiachl auglossn. Foscht hom dei Juden sie nit gian glossn gwellt, sogor a Gespräch mitn Direktor hot sie über sich ergian glossn gmiasst!

Nomittog seinmer mitn Franz und dr Monika zum Antholzersea und uanmoll rundummer gongen. Unterwegs homer in Sigfried, an Cusin von Monika, und sein Kolleg getroffen. Cooler verbrennter Typ der di Zschig in Mund wirft und lei komische Sprüch von sich gib (So iatz sein die Schwiegereltern weck, iatz kennt enk küssen!).



Dei homer nor a bei Ihre Verwondten in Antholz ogliefert und hom versuacht afn Sottl zu kemmen, leider hat mers zeitlich obr nit gschofft (aui lei 30-45min jede Stunde!) und sein so lei als trost a Eis essen gongen!

Beim Sigfried, nit dr Kusin sondern a Monikabruader - sie sein 14 Gschwischter - und seiner Frau Magdalena, homer ins di kronke Kua ungschaug dei in gleichn Tog notgschlachtiget gwordn isch.

In Obend hom di Ebbe und myself mit genua Wein im Schlosskeller und beim Teiss ausklingen glossn!

Grianwoldolm

Vormittog seinmer mit di 2 Letzen, Christian und Maria, ins Griaßwaldele gong. Die Mary hots von ihrem Lieblingsspielzuig, es Bahnl, orgwischt. Obr ausser a por Obschürfungen im Gsicht und am Knia isch guat gongen.

Nochn Mittogessn homer gwellt zur Dürrenstuanhit und Plotzwies, obr leider wor sem a Fohrverbot von 10-16 Uhr und vom Parkplotz starten wors schun zu spoot.

Also seinmer zum Progser Wildsea und ins Grianwoldtol zur Grianwoldhit (1/2 h). Najo recht nett, obr nix bsunders. Dr Searundgong isch obr recht schian.

Am Obend homer no mit dr Monika an Verdauungsspaziergong gmocht und drnoch mitn Franz und Monika mit in Heimatfilm für Heimatferne innigezogn. Noch 1,5h Tobla-Film wor i nor a bettreif!

3-Zinnen-Rundwonderung

So iatz ischs soweit. Seit 5 Johr fohr i bei dei Zinnen vorbei, die Ebbe sogor a Leben long, obr von gleimer homer sie nia gsegn.
Also seinmer von Tobla gstartet mitn Auto (Alternative war Bus gwesn obr sem hat i di Kurven nit überleb..) und sein zum Misurinasea und durch di Maut durch (20EUR) direkt bis zur Aronzohit unter di 3 Zinnen!



Zur Lavaredohit, sell isch di erste der 4 Hitten im Gegenuhrzeigersinn, hom ins nor viele walsche Möchtegernsportler begleitet. Die Plastikbecher und Plastikfloschen hom sie obr wia Profis in die Natur gworfn! Fürs Protokoll: Am Ende der Runde hon i kontrolliert ob sie no liegn, na dei hot a walscher Knecht glott weckgramp, bravo!





Noch dr Lavaredohit seinmer übers Joch (gleimster Punkt bei die Zinnen) und hom die Zinnen endlich von der Seite gsegn wia mer sie von di Postkorten, Milchpacktlen, Joghurt, Socken... kennen! Umwerfend! Nor geats erst bissl owärts nor wieder auwärts zur Dreizinnenhit. Sem sig men hintn ins Sextentol oi.





Noch a Pause zum Kortenschreibn (Postkorten sein "afs Haus" gongen, weil schun die Getränke unverschämp tuier woren!) isch zur Longen Olm gongen. Sem geats erst steil oi, donn obr wieder steil aui.





Bei dr Olm schnell no irgendwelchen Leit vom Schwiegervoter Franz an schian Gruaß ausgrichtet und weiter zur Aronzohit.





Sell Stickl hot sich ziemlich gezogn, weil man dauernd dr Meinung isch, man isch glei do. Rechts geats ausserdem ziemlich oi in a Schlucht dei man besser lei von obn unschaug.



Nor hommer no a bissl beim Misurinasea grostet bevor mer huam noch Tobla sein.



Dei Rundwonderung isch lei zu empfehlen! Es Wonderbuach tat sogn: Leicht und sehr lohnend!
HU vielleicht 200m!

Sulden Kanzel

Heint seinmer Sulden gfohrn und sein vom Dorf aus wo mers Auto gratis geparkt hobn gstartet.

Nochdem mer nochn Weg in an Restaurant gfrog hobn wegn dr schlechten Beschilderung seinmer af an Ort Wohlweg glondet und gegen Süden gongen. Weil ins dr Weg 5 (zur Düsseldorferhütte) zu steil ausgschaug hot, honmergwellt in 15/16 Weg nemmen, weil dr sell onscheinend gemiatlicher zur gleichen Hit gebrocht hat.

Mir hom ins obr irgendwia verfronst und sein nor über di Skipischte und an Brock übern Weg 14 zum Konzelrestaurant kemmen (1h 10 min H500). Dr Ausblick wor nit schlecht af Sulden und die vieln Paragleiter dein nebn ins gstartet sein. (Es hat a en Lift gebn obr mir hobn gwellt sportlich sein..)

Noch an kurzen Jause seinmer weitermarschiert Richtung Düsseldorferhit. Weil obr es Wetter nit so guat ausgschaug hot seinmer bei an Gobelung afn Weg 5 wieder zruck noch Sulden. Zum Glück worn no mearere Leit afn Weg dei a vor an tamischen Kua gflüchtet sein dei ins foscht bis ins Tol teilweise galoppierend verfolg hot.

In Sulden hommer nor neben an kialn schianen Weiher wo a beschaierts Feierwehrfescht wor grostet. Gspielt hobn dr Etschland Express. Selten so eppes schlechts, unprofessionells und nebndrspur gheart!!! Nit a moll a Stromausfoll von 2 Minuten hot dei drauss gebrocht für überhaupt kuan Stimmung zu sorgn. Grottenschlecht dei 2 Leitlen!

So seinmer bold wieder zum Auto und noch Schlanders gfohrn a guats Eis schnabulieren und nor huam.

Lago di Santa Colomba - Lases

Il lago di S.Colomba è uno splendido specchio d'acqua circondato da belle pinete. Nelle sue acque vivono numerose specie di pesci tra cui la trota, la scardola, la tinca, la carpa. Sulla sponda occidentale sorge un albergo-ristorante per i numerosi visitatori, infatti il lago è molto frequentato per la comodità d'accesso (strada di S.Agnese). Viene alimentato grazie a bolle subaquee ed in tempo di piena scarica le sue acque versi il torrente Avisio.




Wegn Stau seinmer über Lavis zum Sea und hobn sem a wia grostet, gschwummen und gessen. Dr Sea isch nett, kluan, volle ruhig, nit unbedingt sunnig ober hot wirklich a tolle Forb, grian. Es gib nit viele Platzlen innizugian, es sunnigste wor leider bsetzt, so seinmer zu uan mit an Soal gongen. Wosser isch relativ worm wenn mans mitn Lasessea vergleicht.

Nochn Essen seinmer zum Lasessea gfohrn (10min Fohrt) und sem (logisch nochdem mer verdaut hobn) nomoll innighupft.

Sem hot mi nor a deppete Biene odr Wesp, che ne so io hoff sie isch toat!, gstochn und mir isch bissl komisch gwordn. Hon glei di Eispeitl von dr mirgebrochtn Kialbox augleg.

Spaater seinmer no (als Trostpfloster..) zumPergineinkaafcenter gfohrn, wia konns onderst sein, an Eis lecken. Und nor über Trient Autobohn huam.

Latschiniger Alm bei Naturns

Geplant wor eigentlich noch Sulden zu fohrn mit Babs und Markus. Obr nochdem sich es in Sulden laut Wetterbericht schun geregnet hot, seinmer in di 2 nochgfohrn bis noch Kastelbell in Berg aui über a wilde stabige Stros bis zu an Parkplotz ow mer di Autos glossn hobn.

Nor ischs ziemlich stiklig auigongen (HU 500 in 1h 10min) bis zur Laschiniger Alp (kluan ober nett in an Tolkessel) dei von an Deitschen bewirtet werd. Noch an Sportwosser und a Palabirnenschnaps ischs wieder owertsgongen bis zu an Kreizung noch an grianen Wies noch an longen stailen Woldstickl. Wetter hot gheb bis af an kurzen Schauer wo mer ins obr noch drinnen verzogen hobn..

Sem seinmer nor links gongen, es gear sem gemiatlich a 1/2 h aussi bis zu an Olm (eppes mit Maischner-Olm odr so, groass und nett mit mäßiger Aussicht af Naturns und Schnolstol) wo Markus und Babs ob und zua aushelfn (keart seiner Kusine). Nochdem mer guat gessen (Ebbe Knedelsupp, Markus Scheppsernes, echt nit letz!, Babs und myself Gulasch mit Reis, ah nit letz!) und a Nangerle af der schianen Wies gmocht hobn (Babs hot sich a groasse Deck fir ins olle glichn) ischs wieder owerts gongen (20min) bis zu die Autos.

Oi in Bichl bis noch Naturns zu an Konditorei rechts zui wisawie von Elektrowerk und an Eisele essen und nor verobschieden und huam. Ebbe isch erschtemoll Mebo gfohrn bis Marling Ausfohrt!

Lago di Tovel

LUOGO: Dolomiti di Brenta-Parco Adamello Brenta
ACINO IDROGRAFICO: Noce-Tresengae
QUOTA: 1178m LAGO DI TOVEL

Il lago di Tovel è adagiato tra i fitti boschidelle Dolomiti del Brenta ed è ricordato dai visitatori per la famosa colorazione rossa di un tempo dovuta ad una piccola alga. Dal 1965 questo fenomeno non si è più ripetuto. Il lago di Tovel è anche detto lago degli orsi per la presenza dell'orso bruno delle Alpi nella Valle di Tovel.







Nochdem mer von Meran übern Gompenposs und ins drnoch no a bissl verfohrn hobn (bin bei Fondo rechts stott links gfohrn und in Revò glondet und di Ebbe umsunst mit mearere Kurven gequält hon) homer a Zwischenstopp beim Lago Santa Giustina gmocht und sein moll schnell innighupft und nochher homer a panino verdruckt. Dr Wosserstonde wor sehr niedrig, man hot di Bruggen gsegn. A por verbrennte Walsche hom sich in der Sun ausgstreckt und aus ihmene Autoradio hom türkischterronische Liader gschriern.

Nexter holt wor nor es Einkaafzentrum vor Cles, sem hom sie obr nix gscheits ghob. Also weiter noch Cles, Tuenno obgebogen und ins Tol bis.. zu an Parkplotz wo sie ins nit weiterglossn hobn bis zum Sea (erscht ob 4e und es wor 1) obr 7 EUR!! fürs Parken verlong hobn inklusive Busfohrt (scheiss Kurven!) bis zum Sea.

Der Sea wor wirklich schian, klor und erfrischend (ungefähr so wia Molveno). Ausser a por Deitsche und mir sein suscht kuane Leit innigongen. Weil mer mitn Bus zruck 1,50 a testa gezohlt hatten und ins beade di Kurven aussi nit unbegint inspiriert hobn, homer ins af an teilweise steilen, teilweise hoassn obr schianen 4km-Marsch aussiwerts bis zum Parkplotz gmocht. Af holb weg muass man a mearere kilometerbroate Stuanlawine überqueren, orkemmen vor 300 Johr.

TIP: Nit weit vom Parkplotz weck sein mearere kluane Seaelen, hat mer also nit moll so weit fohrn und gian gmiasst..

Mitn Auto es Tol aussi bis Cles, wo i dr Ebbe als Entschedigung dür dei kurvenreiche Fohrt an Eis spendiert hon. Dei Piazza wor olleweil no im Umbau. TIP: fürs nextemoll und ondere: Zohlt sich nit aus bis noch Cles zu fohrn wegn Eis!

Übern Gompenposs wieder huam, Ebbe isch gfohrn, a owärts und nit amoll letz, sein mer bold wieder im hoassn Pfloster Meran gwesn. Ausser dass mer gschrepft wordn sein beim Parkplotz um 7 EUR!! wors a netter vielleicht nit unbedingt erholsomer Ausflug!

Levicosea

Heint seinmer nomoll Richtung Trento weil jo dr Ausverkaaf ungfongen hot obr viel gschaits gfunden homer nit. Um ins bei dr Offenhitze (37°) ozukialn seinmer mit an selbergmochten panino bewoffnet zum Levicosea gfohrn.



Wos mer sem gsegn hom wor schun recht erschreckend. Dei hom decht nit di holben Bam ausserghaut und mit an Mordslärm zerleg und wecktransportiert. Erholt homer ins dertersch, grott zu Fleiß! Es Wosser wor a super und a Gruppe walscher Pfadfinder beim Spielen hot ins bei dem Lärm a nimmer gstert.

Nochher bissl shoppen in Trento und Pergine obr recht findig seinmer nit gword und nor huam. Fein, fein so a freier Tog!

Birthday und Diplomfeier am Caldonazzosea

Heitn seinmer mit 3 Autos zum Caldonazzosea gfohrn um mein Geburtstog und es Maturadiplom zu feiern. Mir hom ins mitn Igor und Conny südlich am Sea bei dr Bar zwischen Kinderdorf und Lido getroffen (Igor hot an Extrawurscht gmocht wegn irgendeppes bsudners obgeben in Neumorkt).

Vorher hot dr Rescht (Mama, Tata, Waschtl, Dammo, Ebbe und I) guat in dr Gelateria/Bar im Einkaufcenter in Pergine gessen (Lasagne, Seppie,Solot..) und an Giro gmocht. Beim Sea homer ins mit Gitarrenklänge , Buach lesen und quatschen erholt und verdaut.



A por moll ins Wosser schwimmen, Pol spielen und weiter bis ins Einkaufcenter Pergine shoppen, Eis essen und spaater noch Lases schwimmen (innigongen sein: Mama, Tata, Waschtl, Dammo und i). Nor huam weil mer total kaputt worn. Bei dr Autobohneinfohrt hon i sie olle wegn Telepass gstopft.. Echt toller Geburtstog!

Meran-Jaufen-Sterzing-Bozen-Meran

Unläßlich meines Geburtstoges hon i mer die Tour auswählen geterft (also wos iatz kimp isch olls my schuld!) und so sein mer bei wolkenlosem Himmel und worme Temperaturen ins Pseiertol bis Lirnt und Jaufen aui.

Af holber Possheach homer gmiasst an ungeplanten 20min Stop einlegen wia viele Autos und no mear Biker a mit ins. A Kurf drober isch nemlich a Biker erst gegen a Auto und donn gegen a Bam gflogn. Nochdem der Hubschrauber weck wor, ischs weitergongen bis afn Poss, besser gsog a Kehre drfor.

Sem seinmer nor af Schuaster Roppen zu an Gipfelkreiz des ober dr Flecknerhütte (oder so..) glegn isch. Nit volle hoach, obr sehr stuanig und sticklig. Und ausserdem Ebbe's erschte Gipfelkreiz!!!



Noch an kurzen Stärkung mit Karotten und onderem Gemüse sein mer zur Flecknerhütte ogstiegn wo mer mit Ziarchorgelbegleitung von an Turi-aluanunterholter mit folschem Schilehrergrinsen an guatn Kuchen schnabuliert hobn.

Donn zruck zum Bike und oi in Poss bis Sterzing zu di Biker Days. A jo vorher no zu an Flohmorkt neben Sterzing wo ins di Hitz (obn am Poss 15° unten 35°!) die Schädel unschwelln gmocht hot. Des Bikerfescht wor nit dr hit, lei Bierschnopsleichen. Also weiter bei der Offenhitz bis Klausen a guats Sportwosser trinken, homer echt nötig ghob. Dr Ebbe wor dr Helm zu kluan (vielleicht wegn ungschwellt Kopf..) und sie hot schun an holbn Hitzekoller ghob.

Die Fohrt weiter bis Boazen und über di schottenfreie MeBo wor echt dr Hommer und echt streng. Drhuam seinmer beade floch glegn, Ebbe hot sogor Geräusche gheart des nit gebn hot.. beängstigend.. ausserdem homer ins gschworn nia mer bei so an Sauhitz a längere Tour zu mochn. Schaugn mer moll liabes Togebuach ob mer ins drun holten.

Eishöfe Schnals

Heint hon i in Scooter ins Pfossentol innigequält. Nor seinmer bis zu di Eishöf gongen. So hom mer des gmocht:



Anstieg von Vorderkaser:Die asphaltierte Zufahrt in das Pfossental zweigt bei Km 9 von der Schnalstaler Straße rechts ab und führt teils in Kehren bis zum Parkplatz (gebührenpflichtig) beim Gasthof Jägerrast (1693m). Nun auf dem Wirtschaftsweg taleinwärts ansteigend zur Mitterkaser-Alm (1594) und in mäßigerem Anstieg vorbei an der Rableitalm weiter zum Eishof (2076m, ca. 1 1/2Std.).

Ausdehnung der Wanderung auf das Eisjöchl:Das Eisjöchl ist ein schon in vorgeschichtlicher Zeit benützter Übergang zwischen dem Vinschgau/Schnalstal und Passeiertal/Pfelders. Ein Hochgebirgspass in einmalig schöner Landschaft, zwischen Hoher Wilde im Norden und der Texelgruppe im Süden und Osten, besonders die Marmorfelsen der Hohen und Kleinen Weißen prägen das Landschaftsbild. Der Anstieg zum Eisjöchl im Naturpark Texelgruppe ist neben der landschaftlichen Großartigkeit auch wegen des schön ausgebauten Fußweges ein lohnendes Ziel.Charakteristik:Der bei guten Verhältnissen einfache Anstieg zum Eisjöchl verläuft auf bequem begehbarer, alter Militärstrasse, Bergerfahrung ist trotzdem erforderlich. Eine Übernachtung im Eishof optimiert das Erlebnis.Anforderungen: Höhendifferenz 830m, Gehzeit ca. 3 Std.

Hallo erschtmoll..

Die Ebbe (mein Schotz) und i hom ins in Kopf gesetzt den Summer a bissl mear für insere Fitness und Kondition zu tian und desholb uanmoll es Wochenende afn Berg zu rennen und uanmoll schwimmen zu gian. Nochdem mer in Internet recherschiert hobn unter

http://www.regione.trentino.it/

http://www.suedtirolerland.it/suedtirol/siteSLdeSLe2wSLcategory.phpQMQcategory_idEQQ329.html
http://www.suedtirol.info/SInfo/Activities/DE_Trekking_ActivitiesEntryPage_Leisure.html?Group=EntryPage/Leisure/Trekking

http://alpenrouten.de/Tovel-Lago-di_point1174.html

homer ungfong des a zu verwirklichen. Weil mer obr beade kaum mear wissen wos mer gestern getun hobn, geschweige den vor 2 Wochn, hon i gedenkt des olls a wia niederzuschreibn um spaater amoll nochschlogn zu kennen. Sollte es jemamd von do draussen af dei Seite verschlogn hobn und er a nou den Dialekt versteat, konn er gearn weiterlesen und a di Tips befolgen und die Wanderung nochmochn. Iberhhaupt kuan Problem, war jo no schianer..



A grafik von di 297 Sea in Trentino